Surxon“ga qarshi Superliganing 6-tur bahsidan soʻng (0:0) jamoamiz murabbiyi Asror Aliqulov matbuot anjumanida ishtirok etdi.
Asror Aliqulov: ”Bugun yaxshi oʻyin koʻrsata olmadik. Toʻp nazorati koʻpincha raqib tomonda boʻldi. Agressivlik yetishmadi. Tez oʻynash boʻyicha koʻrsatma bergandik, ammo yigitlar buni uddalay olishmadi.
– Durang adolatli natijami?
– Shunday. Biroq har qanday xato qimmatga tushishi mumkin edi. Shu sababli bahs oxirigacha bosimda boʻldik.
– Jasur Xoltoʻrayev asosiy tarkibda maydonga tushmadi. Bu taktik yurishmi yoki unda jarohat bormi?
– Ha, unda kichik shikastlanish bor edi. Taktikada ham oʻzgarish boʻldi. Qanotlardan uzatmalarni koʻpaytirdik, ammo oʻylaganimizdek hujumlarni tashkil eta olmadik.
– Sodiqovning oʻyinidan qoniqdingizmi?
– Yoʻq, qoniqmadim. Navbatdagi bahslarda oʻzini koʻrsatadi deb umid qilaman.
– “Qizilqum” uchta oʻyindan beri birinchi boʻlimda maydonda sayr qilayotgandek tuyilmoqda.
– Jamoamizda yoshi katta futbolchilar koʻp, ularga tushintirishga harakat qilyapmiz. Bu koʻproq futbolchilarning oʻziga bogʻliq. Ular oʻz familiyasi uchun harakat qilishi lozim.
– Oʻyinlarni bu vaqtga qoʻyish toʻgʻrimi? Baʼzi murabbiylar bahslar 19:00dan keyin boʻlsa yaxshi edi deb aytishmoqda.
– Bu haqida koʻp gapirmoqchi emasman. Roʻza tutib, futbol oʻynash qiyin. Vaqtni PFL belgilaydi. Hamma shunday oʻynayapti. Futbolchilar oʻz vazifasini professionallardek ado etishni xohlar edim.
– Oʻrinbosarlar tarkibida ham yaxshi futbolchilar bormi? Ularga imkoniyat beryapsizmi? Masalan, Diyor Rahmatullayev.
– Diyorning oʻyinidan mamnunmiz. U “Paxtakor”ga qarshi bahsda maydonga tushdi. Biroq hali yoshligini hisobga olib, tajribaliroq futbolchiga imkoniyat berdik.
